Dag og Tid-quizen 13. desember 2024

1. Dei tre siste måleria som har sett ny prisrekord i Noreg, er desse: «Guldhornet» i 2018, «Andersnatten» i 2020 og «Kvitebjørn kong Valemon» i 2024. Alle er måla av same kunstnar. Kven då?

2. Det er stort spenn mellom prisrekordane. Sei ein pengesum i spennet (i norske kroner).

3. Kva er det prinsessa i eventyret drøymer om – og oppdagar at kvitebjørnen har? Det er difor ho slår seg i hop med han. Svaret er å sjå på måleriet.

4. Kven filmdebuterte som prinsessa i Kvitebjørn kong Valemon i 1991, året ho fylte 18?

5. Er ein isbjørn i hovudsak herbivor, karnivor eller omnivor?

6. Den første som skaut isbjørn på Svalbard, skal ha vore Willem Barents, han som oppdaga øygruppa. Dette var på slutten av kva hundreår?

7. Kva russisk øygruppe skil Barentshavet i vest frå Karahavet i aust? Namnet tyder «Nytt land».

8. Kva avis vart i høve Nobels fredspris i 2021 kalla «den mest uavhengige og prinsipielt maktkritiske avisa i dagens Russland»? Dei har sidan måtta flytte utanlands. Namnet tyder «Ny avis».

9. Bertha von Suttner vart internasjonalt kjend med kva antikrigsroman frå 1889? Ho fekk seinare Nobels fredspris.

10. Kva føregangskvinne starta Berthas Bakerier i Søndre Land i 1956? Me godtek kallenamnet, som skal inn i biografitittelen: (…) – med kjevle som våpen.

11. Kva gjengangar i «dei sju slaga» har iaugefallande fasong fordi ein hjørnespiss er smetta inn i eit snitt i snippen?

12. Den fleire meter høge vassplanten Typha har kjevleliknande blomestand. Kva er det norske namnet, som inneheld «kjevle»?

13. Mjøsa har over 50 kubikkilometer vatn. Kva annan norsk rekordhaldar har rundt 70, men ikkje i same aggregattilstand?

14. Genèvesjøen er vatnet i kva kjend rockesong frå 1970-åra?

15. Kva franskfødd teolog som verka i Genève, var den viktigaste reformatoren ved sida av Martin Luther?

16. Genève husar mange aktørar, til dømes Verdshandelsorganisasjonen. Korleis forkortar me namnet?

17. Korleis er BNP per innbyggjar på Mauritius når me ser Afrika under eitt: særs høg eller særs låg?

18. Kva profilert forskar (1962–2024) skreiv doktoravhandlinga med den lengre tittelen Ethnicity and Two Nationalisms: Social Classification and the Power of Ideology in Trinidad and Mauritius?

19. Trinidad og Tobagos første OL-gull kom i 1976 ved Hasely Crawford. Sølvet gjekk til jamaicanske Don Quarrie, bronsen til sovjetiske Valerij Borzov. Kva friidrettsøving var det?

20. Fullfør ordtaket: Tale er sølv, men …

21. Kva for to røyster syng sølvgutane som ikkje har gjennomgått stemmeskiftet?