Dag og Tid-quizen 3. november 2023

1. Kva for ein Oliver, fødd i 2003, vert kalla «årets litterære nykommar» av NRK-meldar Knut Hoem? Han meiner språket i debuten Da vi var yngre er «eit kroatisk-somalisk-norsk fyrverkeri».

2. Romanen Da vi var yngre nyttar mange slangord, til dømes bausj. Kva slags yrkesutøvar er det?

3. Norsk natur byr på blåveis og kvitveis, men òg ein tredje «veis» med namn etter ein farge. Kva art er det?

4. Dei seks stjernene i flagget til Kosovo symboliserer seks kva?

5. Kva britisk luksusbilmerke har mange modellar på E, som Esprit, Elise og Evora?

6. Dei tre spanske monarkane Filip 3., Filip 4. og Karl 2. dekkjer til saman kva for eit hundreår?

7. Er toglinene mellom Oslo Sentralstasjon og Hamar innom Lillestrøm stasjon?

8. Kva heiter avlange, fylte vassbakkels med eit fransk ord? Dette er òg namnet på ein bit i Twist-posen.

9. Kva herrefotballag frå Vestlandet har cupfinaletapet mot Brann i 1976 som den største meritten sin? Dei har spelt mange sesongar på øvste nivå, med 6. plass i 1988 som beste resultat.

10. Kva vert prostataen vanlegvis med alderen: større eller mindre?

11. Nobels minnepris i økonomi går i 2023 til Harvard-professor Claudia Goldin. Ho har forska lenge på korleis ei gruppe menneske har det i arbeidslivet. Kva slags menneske?

12. Kva står forkortinga SIM for i SIM-kort?

13. Kva tyder det latinske uttrykket in flagranti?

14. Kva brite med sterk røyst har gjeve ut fire studioalbum så langt, alle med numeriske titlar: 19, 21, 25 og 30?

15. Kva er det Nore stavkyrkje, Uvdal stavkyrkje og Høyjord stavkyrkje har, til forskjell frå andre bevarte norske stavkyrkjer? Det er lett å sjå dette når du går inn.

16. Kva er den høgaste verdien på Mohs’ hardleiksskala, som diamant har?

17. Kven var det ein sjuk og sliten Odvar Nordli ville at skulle overta som statsminister? Den audmjuke miljøvernministeren (1920–2006) peikte vidare på Gro Harlem Brundtland, som fekk jobben i 1981.

18. I kva sport kan du ta ein trippel axel, med namn etter norske Axel Paulsen?

19. På kva fiktiv gresk øy er kanonane i romanen frå 1957 av Alistair MacLean? Filmen kom i 1961.

20. Kva organisasjon i PLO styrer i praksis Vestbreidda, til forskjell frå Hamas, som styrer Gaza?

21. På kva vanleg blåseinstrument i eit symfoniorkester er munnstykket eit smalt, s-forma røyr som stikk langt ut på tvers?