Dag og Tid-quizen 14. november 2025

1. Kva stadig uferdig bygning i Barcelona er no verdas høgaste kyrkje?

2. To heltar i gresk mytologi, ein nederlandsk fotballklubb og eit reinhaldsmerke. Kva felles namn?

3. Ved Merkur-passasje og Venus-passasje ser den aktuelle planeten ut som ein liten, rund flekk på kva annan himmellekam?

4. Kva for eit ord er i norsk lovverk samlenamn for gaupe, jerv, bjørn, ulv og kongeørn?

5. Kva norsk spel har namnet sitt fordi ein skal finne rett vinnar i sju hesteløp, med minstepremie for fem rette?

6. Kven av dei tre største norske helgenane hadde etternamnet Vebjørnsson?

7. Kva syng du tonen E som dersom C-en i ein C-durskala er do?

8. Sorter elektrisk stol, gasskammer og giftsprøyte i rekkjefølgje etter første avretting i USA. Åra er 1890, 1924 og 1982.

9. Kva bakterieslekt har ikkje namn etter laks, slik ein kunne tru, men derimot etter ein veterinær?

10. Kva for ei Magni er kalla den fremste nynorskstrategen i NRK, ikkje minst fordi ho bygde opp Nynorsk mediesenter i Førde?

11. Kva fransk motehus, skipa i 1854, har LV-monogrammet på dei fleste produkta?

12. Kva stasjon på Dovrebanen er både høgast over havet og den siste du kjem til i Innlandet i retning Trondheim? Stadnamnet tyder «buskapfjellvegg».

13. Desserten kulfi vert ofte skildra som tradisjonell indisk … kva?

14. Kva tyder fagtidsskriftnamnet A&T? To døme på framsidesaker er «Iveco – stor spennvidde» og «30 meter med tømmer».

15. Kven debuterte i 1967 med studioalbumet Hello, I’m Dolly?

16. Jorunn Kjellsby fekk Kritikarprisen i 1991 for rolla som Sigurlina på Det Norske Teatret. Kva roman av ein nordisk nobelprisvinnar var iscenesett?

17. Kva valør finst som gyldig mynt i både svenske og danske kroner, men ikkje norske?

18. Kva omgrep frå arabisk gjev namn til fire verdsarvstader i Marokko og to i Tunisia? Oppføringane heiter «(…) i Fez», likeins med Marrakesh, Tétouan, Essaouira, Tunis og Sousse.

19. Kva (unik) stilling har han som Hugh Grant speler i filmen Love Actually?

20. Kva hyllande karakteristikk vart opphavleg brukt om Det tysk-romerske riket under Karl 5. på 1500-talet?

21. Kva tidlegare populær medlem av den britiske kongefamilien er no fråteken tittelen med meir?