Hoe goed onthou jy 2019?

Wat was Wynand Janssen, die eenbeenman in die opspraakwekkende “Hugo, bel die polisie”-video, aan die skilder toe hy die rumoer voor sy huis in Pretoria-Noord hoor?

Die Bishops-onderwyseres Fiona Viotti het by dié spogskool bedank nadat sy na bewering ’n seksuele verhouding met ’n leerder gehad het. Watter buitemuurse aktiwiteit het sy by dié skool afgerig?

Wat is die verhoognaam van die Oos-Kaapse rapper wie se oorwurm vra: Dames, sê my wat jou naam is?

Rugbykoors loop steeds hoog nadat die Springbokke die eindstryd van die Wêreldbekerrugbytoernooi teen Engeland in watter Japannese stadion gewen het?

Watter Springbok-drieëmasjien het in die Wêreldbekerrugbytoernooi altesaam ses keer agter die doellyn gekuier?

Suid-Afrika se sesde demokratiese verkiesing het vanjaar plaasgevind. Wat was die datum van dié nasionale verkiesing?

Die gemeenskap van Vanderbijlpark was in rou gedompel toe ’n loopbrug op 1 Februarie by ’n hoërskool ineengestort het. Vier kinders het gesterf en meer as 20 is beseer. By watter skool het
dié tragedie plaasgevind?

Prins Andrew is deur die Britse koningshuis van sy pligte onthef nadat sy verbintenis met die veroordeelde seksmisdadiger Jeffrey Epstein aan die groot klok gehang is. Hy het probeer terugkap in ’n televisieonderhoud, maar dit was ’n ramp. Watter joernalis het hom voor die kamera uitmekaargetrek?

Die 16-jarige klimaatkampvegter Greta Thunberg het die tonge laat klap oor die reguit manier waarop sy wêreldleiers aanvat. Van watter land is die jong aktivis?

Die DA is geskud deur die bedanking van Mmusi Maimane as partyleier – en die terugkeer van Helen Zille in ’n invloedryke rol. Watter ander hooflid van die DA het saam met Mmusi bedank?

Prins Harry en sy vrou, Meghan, se eersteling is op 6 Mei gebore. Dié prinsie heet Archie en sy van is Mountbatten-Windsor. Wat is sy tweede naam?

Boer Damian het die meeste briewe in vanjaar se reeks van Boer soek ’n vrou ontvang. Waarmee boer hy?

Die wêreld het saam met Frankryk gerou toe een van Parys se ikoniese geboue op 15 April deur ’n brand beskadig is. Watter gebou was dit?

Op 15 Maart is die wêreld geruk toe 51 mense, onder andere aanbidders, doodgeskiet is in ’n terreuraanval op twee moskees. In watter land het dit gebeur?

Watter fliek het vanjaar die wêreldrekord verbeter toe dit die $2 miljard-kerf (sowat R37 miljard) die vinnigste by die loket verbygesteek het?

Die omstrede Bosasa-baas, Gavin Watson, se lyk is buite die O.R. Tambo-lughawe in Kempton Park gevind nadat hy oënskynlik daar in ’n motorongeluk was. Met watter motor het hy gery toe hy op pad was na die lughawe?